Kuknē

Moto: “Kulināri, ģīpstiet!”

Nikod naasu sacejuse, ka muoku taiseit ēst. Bodā ar naasu. Taiseit piec smolku kulinaru recepta maņ napateik, partū ka sātā nikod nav vysu tūs dīdzātūs rozmarinu, kukuruzys myltu i mandeļu sāklu. Deļtuo atlīk tikai jaunrade. Ite poša deļ seve pīrokstu, kas saguoja gona lobs, kab kod nabejs atkuortuot.

 

Rudzu mafini ar putukriejumu

28. oktobra vakareņu izagrūzeišona

Atguojuse iz sātu, saprotu, ka vakardīnys zupys ir moz, kab paāstu, tok par daudz, kab taiseit ari kū nūpītnuoku. Pasavieru škapūs…

1 kūka lizeika mada
3 metala lizeikys sātys kriejuma
2 ūlys
padsmit kaļteitys malnuos šlivys
rudzu myltu gluoze
drusku kvīšu myltu
capamais puļvers
soda
2 uobeli
soldonais kriejums
cukrys
vanilins

Pārnejū madu sajauču ar bīzū kriejumu, dasytu ūlys i dagrīžu malnuos šlivys. Dalieju drusku oleja – tys ir, olivu eļlis. Vysu sajauču kūpā.
Myltu sejojamā traukā ībieru rudzu myltus, kluot dabieru drusceņ kvīšu myltu i kaidu čaja lizeiku capamuo puļvera i pusi lizeicenis ar sodu. Sakrateju vydā meiklē i izmaiseju.
Kluot dalyku 2 saciorkuotus antonovkys uobeļus i ījauču meiklē.
Īlyku ceptīs 12 keksu formeņuos iz 20 minotu kaidā 170-180 gradu temperaturā.
Pa tū laiku sajauču soldonū kriejumu ar cukru i vanilinu. Beja kaidi 100 grami kriejuma, 2 lizeikys cukra i gondreiž lizeiceņa vanilina (naatguodoju, kas raksteits iz pačkys, bet jis ir taids iz dabeiguo pusi i ar smolku cukru).
Korstus ād ar putukriejumu.

Secynuojums. Maksimums 3 goboli vīnam cylvākam – vaira navar. Var paraudzeit cept tikai ar rudzu myltim, bet pasabeidu, ka byus par rupu tei meikle. Otkon aizmiersu izlikt mandelis nu pārnejūs Zīmyssvātku mada burkys.
 

Vysta ar baklažanim

26. oktobra breinums kuknis remonta laikā

1 broilera gūža
1 vītom īpyvs baklažans
1 zaļa i vītom jau dzaltona paprika
1 rasns būrkuons i 1 tīvs kai skaleņš
puse nu purova kuota
soldonais kriejums
suoļs, pypuri, kaļteiti kropi i seļderuškys

Ponnā zam vuoka apcap gabaleņūs sagrīztu i nu kaula nūlupynuotu vystys gali. Kod atsadola sula, daber suoli, pypurus i kaļteitūs zaļumus. Lai sutynojās.
Izgraiza švakuos vītys, sagrīž i bļūdā ar suoli apmaisa 2 mienešus nūturātu baklažanu, lai jis tī pastuov i pasasuloj sovā nūdobā.
Sagrīž būrkuonus na cīš smolkūs gabaleņūs i daber pi vystys, lai sutynojās reizē.
Sagrīž papriku i purovu.
Piec šaļts, kod būrkuoni jau taisuos labai meiksti, bet vēļ jiut steivumu, daber baklažanus, papriku, purovus, apmaisa i atstuoj sutynuotīs, cikom baklažani palīk caurspeideigi.
Tod dalej bišku soldonuo kriejuma i ļaun vysam šmuki sasust.

Secynuojumi. Papriku lobuok vydā nalikt, partū ka jei ar sovu ryugtumu lāc uorā nu maigi tumeiguo garšu buketa. Rīsus var ēst kluot, bet var ari iztikt – ir gona ar būrkuonim deļ tuo galis daudzuma. Kriejums ar baklažanim, visteņa ar purovim – kūpā taida maiga garša kai kača suons i moza bārna lytka. Nu, tai asociativi. Kluot labi derēja eļļā marināti būrkuoni ar casnāgim.

Leave a Reply

Your email address will not be published. Required fields are marked *