kas ir saprge?

braucūt nu vylku medeibom Sibirī. ļuļkā ir diveji siermi vylki ar atīztim zūbim.

saprge asu es. saprge.

juoroksta ar mozū burtu, partū ka itymā burtu salykumā nav nivīna golvonuo burta.
itys vuords nanūzeimoj nikuo. jis nūzeimoj tikpat daudz kai sevkurs nu itūs sešu burtu, jimts pa vīnam. tei pat nav svātuos gūvs aste Kru ciļts volūdā kai “dada”.

itys burtu salykums nav izalaseits nikaidu dziļuoku nūdūmu piec. es nikuo ar tū nagrybu pasaceit voi demonstrēt. es byutu variejuse lītuot sevkuru cytu burtu kombinaceju, a lītoju itū. taipat kai lītoju gaisu i iudini, kas ir pīejams vītā, kur atsarūnu. voi lītoju greidu, kab tyktu iz prīšku.
partū ka maņ ir pi kuojis, kai pasarokstu. taipat maņ ir pi vīnys vītys, voi kaids zyna, ka saprge asu es. tei nav nūsaglobuošona publiskajā telpā. tys ir tikai vuords, sešu burtu apzeimuojums subjektam, kas pasaroksta ar itim sešim burtim.
tai kai nazkaida paroksta vajag, tod es asu saprge. tys ir, deļtuo ir saprge.

 

itys ir muns golvonais dīnroksts. ite es rokstu (voi īkopeju koč kū nu cytur raksteituo) tod, ka nav galeigs atrubs, pofigs i slinkums. kai ari tod, ka nasagryb dareit nikuo cyta.
itei ir muna izklaide, izprīca, pasaceļšona i muna dzeive – dorūt i rodūt. nu nikuo i nikuo piec. sev i skaiteituojam. i vīkuorši taipat.
partū ka es navaru naraksteit. i rokstu es ite.
papeiri īt i aizīt, internets ir myužam. cikom Latgolā ir elektreiba.

vyspuor es rokstu daudz. maņ jau ruodīs, ka stypri par daudz. tok kotram sova vuts. cyts peipej i dzer, cyts roksta.
raksteišona ir atpyuta, raksteišona ir eļnis dorbs, raksteišona ir pasaceļšona.
raksteišona ir vēļ vīns veids, kai puorlaist itū dzeivi.
es rokstu, kab nabyutu garlaiceigi i kab vysu laiku nasaruodeitu, ka nikuo nadoru.

koč nikuo navar ni paspēt, ni nūkavēt. i nikas nav tik svareigs, kab navarātu byut nasvareigs.
vyss, kū es ite niu pasacieju, nanūzeimoj nikuo. es tik raudzieju pīraksteit koč kuo taida, kas lyktu dūmuot, ka par mani kū nabejs var puorskaiteit i izzynuot. kab teiklā byutu vīta, kas precizi atbiļd iz vaicuojuma “kas ir saprge?”
a seikuok par mani var pavaicuot cytim. cyti vysod vysu zyna lobuok. jī pat zyna, kas asu es i kas ir saprge.

precizuokū defineceju, kas es asu par putynu, pasacēja vīna buoba, kam napatyka tys, ka iz sviļpīņa naasu tī, kur jai vajag, kab es byutu. jei sacēja itai: “viņa dara to, ko grib. un tad, kad grib”.
lai tai i byutu.

piec inspekcejis Boltkrīvejis viestnīceibā. itymā karteņā ir munys dzeivis suoļs.

ka Tev vajag mane satikt, atroksti @saprge. voi pīzvoni. nazkaidi muni roksti atrūnami ari Katōļu Dzeivē, Lakugā, Dīnā i Latvejis Viestnesī.

es doru vysu kū, kas maņ pateik i īt nu rūkys. partū ka dzeive ir tik eisa, eiseņa. vīneigais, kū juos laikā var paspēt, ir dzeivuot.
kod es asu ite, maņ pateik dzeivuot. partū ka juoroksta tik tod, ka ir labi.

paļdis par viereibu! paļdis, ka puorskaitieji da ituos vītys!
tok poša precizuokuo informaceja, kas ir saprge, ir Wikipedejā. jī zyna, kas jei ir. da pādejuo burta. vēļ atrodu itaidu seņ aizmierstu interveju. paļdis Egitai i kačam par sadarbeibu!

naktineica.lv

2 thoughts on “kas ir saprge?”

  1. Loba dīna, Saprge!

    Asu Jysu talanta i rokstu patīsa cīneitoja. Lai Jysus vīnmār pavoda veiksme atrast eistūs vordus eistajā vītā un laikā! Kotrā ”Katoļu dzeivis ” numurā pyrmais kū mekleju ir Jysu vords, i tod lai maņ nivīns nazatyvoj… Losu i apbreinoju tū lelū prasmi vysu tik teiši pasceit. Ar cīņu.

  2. heiij!
    vasaļi jius mojos! 😀
    blogs latgalīšu volūdā… vot tis ir kaut kas nabijis. 😀

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.