100%. tiuleņ byus pavasars, partū ka piercieji veikalā suokuši aizmierst cymdus. tys vysod nūteik pošuos zīmys beiguos. tai maņ vakar sacēja Lucija, kas par puordevieju struodoj jau nu krīva laiku.

a vystom jau niu īsasuocs pavasars – kuopelej pa snīga kupanom, dzer kiustūšu iudini i jau kaš zemi, kur pīsaulē atsalaiduse. pareizuok sokūt, brīn da pus kuojis pa dublim i laimeigys.

naizbāgami ir pavasars – Viļānu tiergā iudiņa beja vaira kai asfalta. kuojis slapnis, pa lada putru sleid. i vysuos moluos tiergoj ogūrču i tomatu sāklys, vairseipūleņus i lileju seipulus. aizguojom da vacūs kopu, kur tiergoj dzeivnīkus. syvāni beja tikai 1 mašynā, cenu nazynu.

beja Pļorka (ci Florence) ar sovu tačku – sēd vaca i leika babeņa lada jiurys vydā iz tačkys i kastē jai sūpluok sierms gaiļs ar sasītom kuojom – trycynoj sorkonu seksti. vys kaida dzeraunis buoba atīs i pajims jū sovom 10 visteņom par prīcu – cuoleišu to vajag. i vystom prīcys vajag i gaiļa dzīsmis.

cytā koktā kastē auss škurynuoja truši, cytā nu kuojis iz kuoju meicējēs izadiejušuos fabrikys vystys, kam teik dūta ūtruo īspieja – atsakūpt dzeraunē, izbezdēt pa vosoru kaidu ūlu i rudiņ zupys kotlā.

a pi vīnys mašynys pīkabis kuoša beja dasīti div suni zylā kaprona stričī. trynuos vīns car ūtru, kuceitis Reja i Brenda. Rejai gods i kolleja purns, bīzs kažuks. Brendai 7 mieneši, lāpauša skatīņs i garys kuojis.

vaca sīvīte atvaduse nu Stiernīnis i puordūd – zīmu savaidiejuse ar pļaušom, vaira navar turēt saimisteibu. treis gūvs nūdavuse, a kam jai vairs suni?

jei stuostēja, kai iz tiergu kotru dīnu poša vaduse pīnu, kai siejuse sīru – eļnis dorbs i nūsajimšona, da i spāka vaira nav. i veseleiba cauri.

tai vot es i tyku pi ilgi maklātuo suņa. “Pučukolnā” niu jauna saimineica. lai tik aug gudra i pacīteiga.

i Luočam, munam kiulys kruosys suneišam, prīceiguok. a to beja palics vīns pats iz diveju sātu.

Category

2 Comments

Leave a Comment

Your email address will not be published. Required fields are marked *

Back to top