cuoli i latgalīši

spams ir spams. sit ar kūku pa golvu cereibā, ka kaids pamanēs. tok, kū vaira syt, tū golvu īraun placūs i aizbāg.

puorskaitieju Indrys dīnysgruomotā juos izjiutys par tautys skaiteišonu i par latgalīšim.
Byudama latgalīte un nūnuokūt tautys skaiteišonys anketā leidz jautuojumam par tū, voi ikdīnā lītoju latvīšu volūdys paveidu – latgalīšu volūdu, prūtams, ka soku, ka lītoju. Un par tū soku paldis latgalīšim aktīvistim, kas izcīnieja īspieju myusus saskaitēt. Bet ir kaida nianse. Naasmu puorlīcynuota, ka atverūt dr.lv, īejūt tviterī voi atverūt ēpastu, grybu vysur saņimt pīckuorteju atguodynuojumu, ka man juopīskaita sevi latgalīšim. Varātu pat sacēt, ka šaidūs breižūs pazamūstās taida cilvieciska īpašeiba kai spīteiba – raksteišu kū gribeišu. Ka pateik lībīšu volūda. Ka pateik lībīši. Par tū, ka jī nanas sovu identitāti ar kareiveigu sejys izteiksmi.

reizi godā mani stabili nūsauc par Latgolys nūlyuzušū zoru. tok maņ nasagryb klīgt, kas kuram juoroksta juo anketā.
tymā pošā laikā vairuoki muni draugi, kas nav latgalīši, cyta storpā atsyutēja ziņu, ka ir anketā atzeimuojuši, ka lītoj tū paveidu – deļtuo ka tys ass jūs dvēselis stuovūklis dreižuok nakai realitate. i ka jī skaita munus īrokstus blogā latgaliski, deļtuo tok volūdu lītoj.

tymā pošā laikā zynu, ka poši latgalīši padūmuos: da kam tei latgalīšu volūda vajadzeiga, ak jau dati kur sasaglobuos i vaļsts varai paliks zinis par mani kai navierteigu cylvāku i volūdys invalidu.

vakar gruomotu izstuodē vīna buobeņa, daguojuse da LgSC stenda, agresivai bļuove: “jums ir dialekts, dialekts, nevis valoda!” latgaliski atsacieju: “nu nav gon tai. ir augšzemnīku dialekts, a latgaliskuos izlūksnis i latgalīšu rokstu volūda.” bet jai vaira tuo navajadzēja: bāgdama prūm, vēļ nazkū bļaukuoja. skali nūkomentieju: “ar trokim pa lobam.”

kaids itai skaiteišonai byus rezultats? jei paruodēs, na jau latgalīšu volūdys lītuojumu Latvejā, a Latvejis sabīdreibys toleraņci pret latgaliskū.

P. S. poša vēļ naasu anketu aizpiļdiejuse – kod beja laiks, lopa naguoja. niu nav laika. grybu izbaudēt tū procesu. īskaitūt “vai jūsu dzīvoklī ir arī citas mājsaimniecības”. tok skaidrs, ka atzeimeišu JĀ. i cyta storpā skaidrs, ka cylvāki, kas skaita munus dīnrokstus, ari tū var mīreigi dareit – lītuot volūdu var vysaidūs veidūs: runuot, klauseitīs i saprast, skaiteit tekstus.

One thought on “cuoli i latgalīši”

  1. Ka nadazynuosim eistynū lītuotuoju skaitu, koč jau aizbuossim mutis tim, kas klīdz, ka itei volūda navā vajadzeiga. I pošim byus statistika, kū karynēt vysur.

Leave a Reply

Your email address will not be published. Required fields are marked *