par kūku

taišni pyrms goda nūmyra tāvs. var tukšumu aprakt kasdīnys īšonuos i aizmierst, a tod nazkas sasastuoj koklā i saprūti, ka nivīns to napažāluos tai kai jis. tai vot i siežu, dūmoju, dzeru čaju i tūmār īlyku itū karteņu i itū sajiutu publiskai apsavieršonai.

pyrms goda kopūs buobys nūsavēre i tod pa koktim nosuoja – jei naļūbej sova tāva, partū ka naraud. tok osorys ir muna i juo dareišona. taipat kai vyss lobais i švakais, kas bejs. suocūt nu kolnu ekspedicejom pa  ustobu, beidzūt ar uobūleņa teirumu i mikriesli pi sātys pakša, kod saprūti, ka ir ari taida līta kai beznūsacejuma mīlesteiba. vīnkuorši esi, ļūbej i vyss, partū ka tys varbyut ir pats svareiguokais, kas tev kai cylvākam ir dūts.

vīnkuorši maņ dūts drupeit vaira kai cytim – raksteit. kab na tāva stuostu i fantazeju, atmiņu i humora i mamys pacīteibys, atbolsta i pakvāleišonys, myužeigūs ryupu, nikuo taida nabyutu. partū ka kotram kūkam ir vajadzeiga zeme, saule, syltums i iudiņs, drūšeiba i atbolsts, kab jis varātu izaugt i tod mest ānu. iz sīnu, iz papeira, iz monitora, iz cytu cylvāku siržu i pruota.

vyss ļaunais puorīt i otkon pavasar saplaukst lopys. otkon cylvākim i lūpim ir pakrieslis korstā vosorys dīnā. a kas zyna, kū zīmys soltumā dūmoj kūks. kas jam aiz myzys i nu kuo patīseibā pavasarī suoc tecēt sula.

seika fotošaļteņa nu šudiņdīnys pastaigys.

One thought on “par kūku”

Leave a Reply

Your email address will not be published. Required fields are marked *