sabīdriskuo transporta riņdenis

_______________________________________________

raugu nikaidus paņteņus  naraksteit, partū ka kuram besam tuo vajag.
Tev tuo vajag? maņ točna navajag.
tok, vot, nazkai pasleidēja kuoja –
17. janvara vokorā tramvajā i 21. janvara vokorā autobusā.
da sātys maņ juobrauc laikam 10-15 minotu labi ja.
tai vot i pīrakstieju pa ceļam.
nazkaidi bradzakli – eisys prozys riņdenis.

_______________________________________________

korespondenti pīroksta vysus vuordus
i na vysus jī īvāroj.
irā taidi malnī caurumi –
sit, cik gribi, atbiļdis nav.
tys ir kai pusaudžu sekss –
ir rūbežys, kurom navajag puorkuopt.
meitinis piketej iz īlys –
eisi bruņceiši, gari moti i smejās.
volūdai ari gribīs,
ka jū pajem mutē.

_______________________________________________

ar mobilū teleponu nūfotografieju sauli,
jei īsaspīde bolta, i displejā caurums.

ka lelys vierteibys nūglobuot gruomotā, herbarejā,
piec divdesmit godu kaids atškiers i īraudzēs –
dzaltonā lopā caurums.

_______________________________________________

pasauļam šudiņ nav kruosys –
malnbolta saule īsasprīde kūkā,
vysi saulis plankumi nūtreisēja.

peliejuma sieņs sareni vuoreigi, smolki, sylti.
pasauļam dečeits, vatalina kažuceņš –
pīsadūrsi, i paliks pādi. kai mīsā.

par ceļu puorguojuse lopsa,
i zača pādi snīgā – div, div.

itai, kai šudiņ, nabyus nikod.
meikstyune apād kruosu.

_______________________________________________

pasauļam itam nav laimis.
čīzburgeri karteņuos smaida, nu mutis lein sīra mēlis,
kartupeļu frī dvēseleitis tik breivys i skraida pa škīvi.
kečups kai asnis iz lada.

pajemu olu i īleinu sovā olā.
pasauļs digitāli loksta aiz lūga,
trolejbusi aizšveikst kai reklamys klipi,
cylvāki aizīt doncuodami.

krišnaīti ir Reigys viltuotuo Bolivuda.
ružovā kļūsterī pagaisuši cylvāki nūviltoj dzeivi,
īsaciklej iz laimi i ej – smaideidoma, doncuodama, harē, harē.
malnuos katuoļu manaškys smaida rešuok. jom bais.
pareizticeiguos pareizi aizīt kai malnys sīna gubys.
kaids na tai saprass. Dīvs pasasmej ūsuos.

_______________________________________________

pareizuo bīzuma linejis
puorstreipoj munu dzeivi.
pareizī vuordi izcalti,
cyti zam streipis.

iz sagrafeitūs lineju
sēd bezdeleigys i čūrkst.
svātdiņ piec leita
slīkys staipuos pa stygu
dubļūs izastīpušys garys.

mīsys kruosā.
muni fragmenti
puorsavītoj.

_______________________________________________

smierts vysod vysu sadola žieleigai – myrušī, dzeivī.
a cyts ir nūmirs pyrms laika i vysleidza ir dzeivs,
juo kauli staigoj pa īlom, juo acīs atspied īlys nateireiba i tymss.

ka varātu saskaitiet vysu, kas nūtics bez laika.
apreibynuotī i dzeivī nazkaidā dzeivis mutulī maļās.
tukšums izplieš spuornus
i gaida.

_______________________________________________

kur ta irādana tī dzeivī –
dzeivis uzvarātuoji,
dzeivis pionieru maršs.
pensionerkys puorskoloj kaulus
bazneicys duorzā piec Miša.
bazneickunga mašynai jaunys šynys,
i juo kuce apsabārnuojuse.
kuce taida.

bazneickunga kucei loba paroda,
vīgli aizīs nu rūkys, lai kaidi tī laiki.
a laika kai vysod vaira navādana.
laika tik daudz kai nūmiert
i bezgaleigi gaideit – vēļ vīnu šaļti.
i spēlētīs ar smierti kai cacku –
šudiņ, reit voi nikod.

_______________________________________________

Leave a Reply

Your email address will not be published. Required fields are marked *