Volūda i privatīpašums

jē! šudiņ palaista jaunuo Lakugys verseja.

nūtykums breineigs i ceļsmeigs, partū ka, pyrmom kuortom, tei ir lopa, kas pretendej viesteit par latgalīšu kulturys dzeivi – cytaiž nazkur periferejā izkaiseitu i fragmentari radzamu. ūtrom kuortom, itei jaunuo verseja nosuota jau godim ilgi i beidzūt palaista par gūdu rakstnīka Ontona Slišāna dzimšonys dīnai, kū jis tai i nasagaidēja. trešom kuortom, lopys saturu jau nu suokta gola taisa vairuok cylvāku – kotrs dalīkūt informaceju tod, kod jei ir aktuala, i nagaidūt redaktora voi moderatora atļuovis.

lakuga.lv vacais variants. 28.12.2010

lakuga.lv jaunais variants. 28.12.2010

itys roksts nav ni vacuos, ni jaunuos Lakugys versejis kritika, koč var pīsasīt daudz kam – i salatu zaļajai partejis “Vienotība” kruosai, i niulenejam saturam, kas vaira ir Latgolys Studentu centra sātyslopys lgsc.lv satura 1:1 kopeja, mozuok pošys Lakugys saturs. navarātu saceit, ka pādejā laikā Lakugā rokstu ir moz i, sekojūt RSS pādim, jī byutu nūskriejuši nazkur zamyškā. jūs kopejis nav. 🙂

vēļ pīzeime – koč i lakuga.lv jau nu suokuma ir bejuse i šudiņ ir LgSC projekts, iz tū nav nikaidys atsaucis nivīnā vītā, tymā skaitā sadaļā Par myusim. narunojūt par linku iz LgSC sātyslopu. tuo vītā nūkopeits lopys saturs. rūnās īspaids, ka latgalīšu vide ir na viņ šaura, a juos vyspuor nav – tik vīnys latgalīšu bīdreibys darbeiba.

koč juosoka, ka konceptuali pastateit, ka Lakuga byus tikai latgalīšu, a ni Latgolys kulturys dzeivis lopa, ir sevi īlikt kletkā. kur suocās latgaliskuo kultura i kur beidzās Latgolys kultura? a kur latgaliskuo kultura nūškirama nu pasauļa kulturys? voi kūra “Kamēr” koncerts Latgolā byutu Lakugys cīneigi, ka jimā nabyutu nivīnys dzīsmis latgaliski i dzīduotuoji nabyutu latgalīši? a ka dzīduotuoji byutu latgalīši, tok dzīduotu angliski? voi Lakuga viesteitu par pasauļa popzvaigzni, kas sovā dzīsmē 1 rindeņu deļ eksotikys dzīd latgaliski voi latgalīšu dzīduotuoju, kas dzīd italiski? a hokejs? peišonys kursi? stykla pūdu izstuode?

kur tod ir tei latgalīšu kultura i cik juos ir – ite koč voi vārts atguoduot latgalīšu kulturys goda “Boņuks” peripetejis, ka, nu vīnys pusis, nav jau tū nūtykumu i cylvāku, kū izvierzēt, a gols golā izaruod, ka vīneigī, kas par tū varātu zynūši lemt i byut žurejā, ari poši koč kū dora i teik nūsaukti pretendentu storpā.

pats sev zūbuorsts i kirurgs. tok ka nivīns cyts tūs zūbu naūrb, kaidam tys juodora. koč voi pošvuiceibys ceļā i ar spīgeli.

suokums šudiņ kai jau suokums. ar klaidu paziņuojumim i breinumim.

tok na par tū stuosts. mani vysu vaira puorsteidze sadaliejums trejuos slejuos i trešuos slejis saturs: Twitter, Kū runoj par Latgolu, Sadarbeibys partneri.

ar kū saprge, LgSC, Edeite, termilv, jureits, Raibiis, cyxob i geoviita lobuoki par Moziis i freima, kas taipoš roksta latgaliski? voi ar tū, ka vasali 6 nu 8 nūsauktūs ir LgSC bīdri i personeigi zynomi Lakugys taiseituojim?

tok ite cyta problema – voi kaids nu itūs cylvāku ir pīkrits, ka juo roksti pasaruoda cyta sātyslopā. pasauļa prakse vysaida, i vyss, kas publiceits teiklā, ir nu teikla tikpat vīgli pajemams i kopejams. a ite saīt, ka latgalīšu volūdys (voi potencialys raksteišonys latgaliski) deļ cylvāka mikroblogs voi seikdīnroksts teik dalykts i taisa kaida cyta lopys saturu.

nui, nu vīnys pusis tei ir vareiba runuot ar plašuoku auditoreju i viesteit daudz leluokam cylvāku skaitam, kas varbyut myužam nasaregistreitu tviterī. nui, tei ir ari reklama i īspieja apsazynuot sovu pīdereibu latgalīšim.

a es par sovu privatū dzeivi. voi vyss, kū es dūmoju i pīrokstu, ir plakats, kū grybu karynuot pi sātys sīnys. voi dreižuok – voi es, koč i apsazynoju, ka nu teikla nikas navar tikt izdzāsts, gryb byut nazkaida “Muote Latgola” i tik latgaliskā kontekstā kai Latgalīšu Kulturys Gazeta raksteit par sovu dzeivi i breinumim, kū īraudziejuse. tymā skaitā pasauļam ruodeit sova seikdīnroksta saturu ar vysaidim kasdīnys seikumim i glupuostem, kai ari saraksti ar cylvākim, kam bīži nikaida sakara ar latgaliskū.

voi cylvāks var byut 100% latgalīts 100% sova laika? voi Latvejā var iztikt tik ar latgalīšu volūdu? voi muni realī i virtualī draugi ir tikai latgalīši? voi maņ sevi juolīk kletkā, kab pasauļs palyktu varbyut na lobuoks, a latgaliskuoks?

voi maņ pīnuokums raksteit tikai latgaliski kulturalus rokstus, kab byutu loba latgaliskajam pasauļam, voi apklust i puorsavuokt iz cytu tvitera kontu ar cytu vuordu?

ka nalatgaliskais pasauļs ar munu latgaliski raksteitū breineigi tics golā i skaita, ka tuo gryb i tys interesej, voi latgalīši tiks golā ar munu nalatgaliskū pasauli. atguodojit koč voi Marijis Andžānis pīmāru – kai jei trimdā pīdzeivuoja puormatumus, kam roksta ari cytā volūdā, ka latgalīšu literaturys tok tik moz, i nikuo napublicēja godim. voi Juoņa Klīdzieja pīmāru, kas atsasaceja raksteit latgaliski i sovus tik latgaliskūs dorbus pīraksteja i publicēja latvyski.

voi latgalīšu volūda ir pīnuokums gluobt mierstūšu pasauli? voi latgalīšu volūda ir breiveiba izsaceit pa sovam, kū nikod navarātu pasaceit īvuiceitā i svešā volūdā?

pa munam, ite ir tikai vīna izeja – izlikt filtru, kas Lakugā publicej tikai konkretu Lakugys redaktora izalaseitu ļaužu īrokstus, kas markeiti ar zeimeiti #ltg – aptuvanu tvitera latgalīšu sarokstu var apsavērt ite. kas gryb, lai roksta i īzeimoj sovu īrokstu ar zeimeiti – kod apsazynoj, ka juo īrokstam kaids sakars ar Latgolu, i gryb runuot ar leluoku auditoreju. kas nagryb, tys dzeivoj sovu dzeivi.

mes naasam nivīna īpašums i myusu teksti na tik, koč jī pīraksteiti volūdā, kū lītoj moz cylvāku i kū dzaudzim grybātūs privatizēt.

kai jau ruoda sleja, kas giun atslāgys vuordus, kas saisteiti ar Latgolu, tys nav nikas naīspiejams. tai ari saturs saīt daudz atbylstūšuoks – na ar nazkaidom kaida izalaseitom personeibom, a latgaliskū saisteits.

eisi sokūt – veiksmi! i lai izadūd.

9 thoughts on “Volūda i privatīpašums”

  1. Nazvoi par tū aizadūmoj breidī, kod lopu taisa, tys ir tikai cilvieceigai, ka vysus seikumus navar paturēt pruotā, pat ja mums nasaruodīs, ka tys kaids seikums.
    Byutu jau breineigai, ka varātu realizēt tū atzeimeišu sistemu, tok voi mes pi kotra čīpstīņa īsadūmuosim cik tys svareigs Latgolai? Nazvoi. I mentalitate naļaun sevi reklamēt, deļ tam tei sistema varātu uotri vin “nūmiert”.
    Tok byutu jauki, ka byutu kaids profils (pīmāram: twitter.com/LaKuGa), kas sekuotu tai LgSC listei i retvītuotu vysu, kas byutu tuo vārts, lai tyktu publicāts sātyslopā. I ja nu kaidam napateik, tod opcija “Undo Retweet” daudz vīgluok realizejama. Tys muns īteikums, pat ja nivīnam nav laika, lai ar kaut kū taidu jimtūs.

    1. var jau byut – nav tolka sarežgeit dzelys i gona pavaicuot tim ļaudim, voi jī gryb. (teoretiski var navaicuot, partū ka publicej publiskā telpā, tok, nu ūtrys pusis, kaids cyts pajem jūs raksteitus tekstus i puorpublicej – pi tam na anonims servers Kīnā, a sovejī.)
      maņ tys ir diskomforts, partū ka laikam gona asu dabuojuse pa golvu i vyspuor napateik tei tvitera likšona sātyslopuos – naradzu jāgu. ka naskaita svešu ļaužu acs.
      nu ūtrys pusis, @saprge ir muns publiskais konts. bubynuošonai burceņā ir cyts.

      bet nu itys roksts muns privats vīdūklis.
      cytaiž nudi prīca, ka jaunuo sātyslopa sataiseita i palaista! paļdis Juram, Guntim i cytim!

  2. Man reizēm rodas sajūta,ka man jājūtas,kā “nodevējai”, ja par latgalisko nerakstu latgaliski. To gan rada tikai anonīmi komentētāji,kuri paslēpušies zem saviem segvārdiem interneta telpā jūtas vareni un īsteni latgalieši vai daži pat latgaļi. Laikam šos cilvēkus māc kāds mazvērtības komplekss vai kāda cita psiholoģiskas dabas problēma. Kopumā pievienojos daudzām Tevis izteiktām domām rakstā. 🙂

    1. a mož kompleksi ir Tev. 😀 tai reizem es par sevi – ka jau maņ ir nazkai naārtai, ka ļauds īrauga, ka rokstu, varbyut navajag raksteit voi ari juopīrūn.

  3. Tā jau ir, ka kokam divi gali. Laikam man valodas jautājums nav tik aktuāls un sāpīgs kā citiem. 🙂

  4. vysa kū var izdareit.* ka nagribit, lai Jius skaita ari lakuga.lv skaiteituoji, nikaidu problemu – nūjimsim tīšū puoradresaceji.
    Vaicuojums: Voi Tviterī, kod kaids “retvītoj” jiusu zini, ari juovaicoj atļuovis? Drusku nasaprūtu, kur ite problema atrosta 🙂 Deļ kam tod vyspuor “čyvynojit”, ja nagribit, ka tū kaids skaita? 🙂
    LgSC nūpalnus LaKuGys izveiduošonā daliksim – vysu paredzēt, lai visim byutu pa pruotam, nav īspiejams. Golvonais, ka tys ir piec īspiejis vyspuseiguoks olūts.
    Kruosa? 🙂 napateik zaļa, liksim palāku? – tū, cerams, vēļ nivīna parteja nav pajāmuse…
    Paļdis par veseleigu kritiku, bet naškaļdeisim motus. Veiksmeigu i radūšim dorbim pylnu jaunū godu!
    *…bet var ari nikuo nadareit.

  5. nu kura laika ar mani juorunoj iz Jius? 😀
    maņ jau nav nikas pret tū, ka skaita, tok ir bezjiedzeigi i Lakugys saturam nikuo nadūd mehaniski retvītuot vysys @atbiļdiskočkam.
    cyta līta – atslāgys vuordi. tod ari saturs saīs pa dzelai.
    tai kai maņ ryup rezultats, pīrakstieju itū rokstu. byutu pi kuojis, nikuo nasaceitu.

  6. ….”tik vīnys latgalīšu bīdreibys darbeiba???”
    Kod as syutēju informaceju par myusu bīdreibu, tod Lakuga tū vīnkōrši nalyka īkšā.

  7. hm – Lakuga parosti publicej vysu, kas latgalisks īsyuteits.
    atsyutit vēļreiz iz lakuga@latgale.lv
    var ar pīzvaneit i puorvaicuot, voi sajimts 26393531

    iz prīšku raudzeisim dūt vareibu pošim likt vydā vysaiduoku informaceji pa taisnū 🙂

Leave a Reply

Your email address will not be published. Required fields are marked *