leli mozi prusaceni

armi

Apmāram tai es jūs zeimeju. Navaicojit, kas jī ir. Jim nav ni dzymuma, ni darbeibys. Jī stuov i verās – vysod apmāram tī poši i kotru reizi cyti. Garim, garim tausteklim.

Lobuokuo garlaiceigu lekceju izklaide ir zeimeišona. Niu ari konferenču. Tūs konferenču, kur pasagoda referati na par eistū temu i leidza nav datora, kab varātu raksteit tekstus voi viestulis. Ari 140 zeimu garys, tuos vysbīžuok tūmār ir viestulis kaidam voi vyspuoreibai. Pat runuodami ar sevi, mes runojam ar kaidu.

Tviters ir vīntuļnīku paradīze, kur atrast sovejūs, naizeimūt nu sātys. Tū var redzēt koč šūvokor, kod spontani dzyma #twitterkrogs – sarunys par nikū i par vysu, kū roksta ļauds bess zyna kur. Nav svareigai, kur jī atsarūn i parkū nadora nikuo pruoteiguoka, a meklej sovejūs monitorā.

twitterkrogs

Jau lobu laiku asu saprotuse, ka nikod vysi muni draugi nabyus vīnā vītā – cyts Londonā, cyts Hamburgā, cyts Minskā – tok jī vysi ir socialajūs teiklūs i munā monitorā.

Pagaidom tviterī ir vaira sovejūs nakai vysaidūs dr.lv i jūs klonūs i radinīkūs. Cyti soka, tī ir par moz ļaužu. Maņ ruodīs, tī ir eistais skaits cylvāku i tī ir eistī ļauds. Kas der vysim, nader nivīnam. Kur ļaužu par daudz, nu tīnis ir juoaizīt.

Mani tikai fascinej vysi tī tvitupi i jimšonuos ap jim. Ļauds savibrej, savibrej, sasalosa kūpā i tod ar gudru seju sprīž par sovu jaunatrostū dīvu tviteri i par jaunū religeju tviteruošonu. Sasajutuši koč kaidā ziņām asam informacejis teikla vierspusē, jī ar pylnom mutem gruob gaisu i runoj, runoj, runoj. Kai ar kotru jaunu religeju – ir sludynuotuoji, ir ticeigī, ir atkritieji.

Tok laikam ir vēļ cyts sadaliejums – blogeri i cylvāki. Tūs pyrmūs, paļdis Dīvam, nav daudz. Tūs ūtrūs, otkon paļdis Dīvam (i ni tviteram kai dīvam), palīk vys vaira i vaira.

Es pīdaru pi cylvāku i skaitu cylvāku blogus, kur jī roksta par sovu dzeivi sātā i pasaulī. Lobuok par vysim romanim. Kotrs var par sevi pīraksteit sovu stuostu – taida aksioma. Aksiomys navajag pīruodeit, juos ir.

Nu i. Mes vysu laiku rokstom i sasarokstom, mes asam par tuoli vīns nu ūtra, kab varātu apsarunuot, a mobilais telepons ir par daudz lels surogats. Gols golā viestulis rakstēja i myusu muotis i tāvi, i babys i dzedi, i jūs prodzedi i probabys. Iz tuo fona telepons ir myusdīnu cacka.

viestulis_000002a_spiergu_puisi_nu_kara_fragments

Tik jim beja vairuok laika raksteit, partū ka jī vysu laiku narakstēja. Ka saskaiteitu vysus “skaipa romanus”, “bloga publicistiku” i “tvitera eisprozu”, tī saītu na vīni vīn kūpuotī roksti. Tok tam nav ni gola ni molys, tekstā mes īlīkam sovu laiku i cerim, ka nazkod byus gona laika jū puorskaiteit. Tok, cikom skaiti, nanūteik nikas jauns. Cikom roksti, gon.

Tai niu puors definiceju, kas ir #twitterkrogs. Juos tyka pasaceitys pa tū laiku, cikom rakstieju i dzieru – realitatē, pi monitora i tvitera krūgā.

nekas īpašs. šādi tika saīsināts “@Ilzeens @kosmodroms @saprge @verners @ArtaG un citi “, lai 140 zīmēs vēl būtu vieta tekstam. saprge

tas ka fiziski neesam pie viena bāra letes – bet katrs pie savas, bet tomēr kopā 😀 kosmodroms

Tas nozīmē, ka iedzer katrs indivuduāli, bet alchokola ietekmētās atziņas dara zināmas visiem šeit 🙂 ArtaG

laikam radio Skonto bija saturiski līdzīgs dzingls “mēs guļam atsevišķi, bet mostamies kopā” 😀 kosmodroms

Labas dienas noslēgums ar labiem darbiem. Virtuālas sarunas. Reāli dzērieni. Nereāls reibums. verners

– dzeršana vienatnē ar sevi, bet virtuāli – kompānijā 🙂 AgneseEmm

Taida tei dīna saguoja. Suocēs ar aizaguleišonu i zeileiti pi ustobys lūga, kas syta ar kņuobi pa styklu i pamūdynuoja pādejā šaļtī, kab paspātu iz tolku, beidzēs ar virtualu krūgu. Tai vot i dzeivojam.

Tok paļdis tolkai i lelajim (lielie.lv), partū ka dzejūleišam par prusacenim šudiņ pasamainēja 2 riņdenis. Šudiņdīnys dzejūleits apakšā karteņā, vacais dzejūleits ari apakšā, ite.

mozu, mozu prusaceņu
lelu nav, kuo ļūbēt
mozu, mozu prusaceņu
lelu nav kuo cerēt

prusacenitrillini

Pošuos beiguos munu ausainūs ārmu karteņa. Jī tī poši, es tei poša, tikai ni ar zeimuli voi pildsplovu puors mehanisku kusteibu iz papeira, a nazcik stuņžu pi Bārnu slimneicys statiņa, raugūt tikt golā ar kruosu, kas tak, nasakluoj, leip. Tai jī palyka taidi rasni, rasni i ar garom kleitom – raugūt sagluobt nūteciejumus.

Kod guoju prūm, mozajim trillenim suoce tecēt acs. Nazkai jūceigai palyka, tys tok taids dzāruoju styurs tymā teritorejā – tai sacēja sietneica, ari puors dzāruoju daguoja kluot i apsarunuojom par bārnim i bizbizmāreitem. Kotrā dzāruojā vysleidza ir bārns, ar kū par apsarunuot par nabyutiskim seikumim.

Acs izlobuoju – cytam saguoja daguns, cytam lelys acs. Naraudit, mozī. Dzāruoji jiusu dasavērs i izdzers par jiusim kaidu čarku ari tod, kod byus solts i snigs snīgs.

Beiguos, pyrms tviterkrūga bārmeni laist paceļu, pādejuo dzīsme nu virtualuo krūga. Arlobunakti!

@Ilzeens @kosmodroms @saprge @verners @ArtaG un citi

3 thoughts on “leli mozi prusaceni”

  1. Pingback: Twitted by verners

Leave a Reply

Your email address will not be published. Required fields are marked *