Noglys i pučis

Raugu sasajim leluokam i analitiskuokam dīnrokstam, tok laiks nazkur pagaist, raunūt seikūs darbeņus. Sasaškeļ 1000 druponuos. Varbyut vokorā, varbyut pa nakti. Nu reita i pa dīnu ir aktualuoki dorbi.

Aņss ir dabuojs Latgolys planavuošonys regiona atbolstu.

NRTVP presis relize – nazkas nu radejis bejs padūmē. Labinskis?

Sabīdreiba cytai politikai beja sagataviejuse viestuli NRTVP, atbiļdis nav. Laikam byus jauna viestule.

Tikom komentaru kari apollo. Beju dūmuojuse, ka myusu dīnuos vaira nav augsnis, partū ka itaidi komentari beja 90. godūs pi kotra roksta. I vēļ nažieleiguoki. Izaruod, ir auditorejis segments, kas palics tikpat tymss i ksenofobisks kai tod, kod beju moza i glupa i suocem dūmuot, kū dareit. Tai ka byuteibā niu otkon juodūmoj – kū dareit.

Kai Plīkšuonu Juoņs rakstēja – “Tei ceiņa nav golā i nasabeigs, cikom Laimdūta Luočpliešam paleigā steigs”. Voi nazkai tai, maņ nav talantu iz citatu atguoduošonys. Dūma ak jau taida, ka vajag ari drupeit laimis i drupeit vīgluma – ar vasari var noglys dzeit, ni pučis statēt. A latgalīšim oi kai vajag puču, laimis i dorbu atsaveikšonys.

Petru Pīteram par itū temu šudiņ lobs roksts Lakugā – par mīžim teirumā (ak jau vasari i Luočpliesi) i rūzem duorzā. Tik drupeit cytā paviersīnī. Par Latgolu i Reigu.

Veiksmeigu vysim dīnu!

Byus labi, partū ka mes vysi asam niu i ite. 😉 I voi tys nav breineigai?

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.