Birdy (1984)

[youtube=http://www.youtube.com/watch?v=hfGwJGrLz2w]

Vakar dūmuoju puorbaudeit, kū nazkod asu nūkāčuojuse nu teikla. Nazkaida kina, režisors Alans Parkers, Nikolass Keidžs jauneibā, mistika. Dūmuoju, pasavieršu, kas tys ir, i īšu gulātu. Nu reita juosaceļ.

Nūsavieru da gola. Pajēme.

Par div draugim, patīseibā atškireigim – vīns ir normals džeks, kam interesej i buobys, i dauzeišonuos borā, a ūtrys vīnpats, cytaidais, cylvāks “ar putynim” golvā. Ruodīs, kas jim var byut kūpeigs, tok nu jī sasadraudzej i dasaver vīns ūtra.

Obeji teik Vjetnamys karā. Vīns sakrūpļuots fiziski, jam iz sejis ir apsiejs, metals kaulu vītā, a ūtram aizbrauc jumts.

Te ari aizasuoc stuosts. Par kara nažieleibu pret vīnkuoršuo, mozuo cylvāka dzeivi. Varbyut kam nabejs tuo gļuka Gruzejā, tys tai nasaruodeitu, a niu nazkai da mīļu. Kars puorbrauc i samaļ, a vysa dzeive lupotuos. Kai vīns nu jūs soka – kab koč mes byutu varūni. Byutu cyts kars, saītu dzimtinis aizstuovi, varūni, a niu par veļti samaituotys dzeivis.

Pyrmais draugs rauga dasarunuot da ūtra, kas truli verās nakurīnē i īsadūmoj sevi par putynu – kas var aizliduot prūm nu vysa, kam nav rūbežu. Tuo vajag jim obejim.

Ek, kū tī daudz. Kina ir kas vaira nakai niu te varu pīraksteit. Par nazkū taidu vuoreigu i smolku, kas satryukst – kai putineņa dzeiveiba, īsatrīcūt styklā i puorlaužūt koklu. Vēļ sylts i meiksts, dreiž sastiņgs. Nu žāluma navari, a nikas nav leidzams.

Leave a Reply

Your email address will not be published. Required fields are marked *